Quen somos

Para os que non coñezan ben esta revista, tres pinceladas que pensamos que nos fan orixinais:

Primeiro: o noso Ecumenismo Ventureiro. Híbrido, aberto, antidogmático. Un ecumenismo de corredoira, agora que a metáfora do Camiño está algo secuestrada. Non pretendemos equidistancias, pero distamos millas dos fundamentalismos de babor e estribor, porque, como dicía Pepe Chao, fundamentalismo debe vir de “funda mental”. E temos algo de inetiquetables. Que si, que abofé que temos fe, pero sobre todo queremos ser xente de boa fe. Fe nunha decidida maneira de estar no mundo: a das mesas compartidas, a do que baixa do cabalo para atender ao que cae, a de dar vista ao cego, voz ao mudo, liberdade á oprimida… un ecumenismo da ortopraxe, da esperanza compartida, cos pés na nosa terra, nesta terra… Ese ecumenismo da xustiza que une a crentes críticas e moi diversas, a escépticos honestos, a pesimistas esperanzados, a agnósticos humanistas e a ateos grazas a Deus.

Segundo: que estamos ancorados nun Panchovillismo descabezado. Que nos sabiamos a Tropa de Pancho sen Pancho pola corredoira arriba (quizais pola corredoira abaixo). Que desde hai 17 anos non temos director e que na mesa de redacción practicamos un coralismo extremo, e que estamos a gusto, descabezados impenitentes que en rede montamos a Irimia a golpe de espontaneísmo e gratuidade, de vontade, de mil colaboracións horizontais, xenerosas… Sobrevivindo sen Pancho e sen Zapata…, e así nos vai… de ben.

E terceiro e último, que temos vocación de lévedo na masa. Non de masa. Si de fermento. Na clave dun levedismo radical. Que apostamos pola conquista da soberanía no cotián. De que a xente que non conta recupere estima e dignidade, polo seu falar, polo seu saber, polo seu sabor. Dar esas pequenas alegrías, esas boas noticias, sen chupar o dedo nin comungar con rodas de muíño. Boas noticias incribles, das que fan mover a historia, como esa de que os últimos serán, han ir sendo, teñen que chegar a ser,  igualiño ca os primeiros.

Información sobre a Asociación Irimia

Tamén podes consultar de balde ós pdf dos números do 2009 para aquí: http://asociacion-irimia.org/revistas.html