Editorial: 25 de xullo, un día para o orgullo galego


25-de-xullo Galicia necesita boas novas sobre si mesma. Levamos preto dunha década de horizonte gris e esperanza decaída. Un cocktail amargo para o galeguismo, certamente, esa mestura de gobernos recentralizadores e a sonada “crise” que valeu de desculpa para case todo.

Galicia necesita reaparecer. Reaparecerse. Mostrarse a si mesma capaz de ter un futuro de seu. “Venderse” a si mesma como un produto de calidade. Convencerse, autoconvencernos de que somos quen, sen tutelas, sen caxatos prestados, superando esa esmoleira conciencia de “sitio subvencionado”.

Galicia necesita vencer, contrarrestar a axenda oculta da “Galicia 0”, da nacionalidade devalante que nos desgoberna, ese proxecto acochado entre liñas dos mandatarios de Galicia e Madrid. Saberse nación histórica, saberse potencia e capacidade. Saberse alimento excelente, tecnoloxía punta, deseño, arte, teatro e audiovisual de seu; saberse con lingua propia benquerida de poetas e científicos, de igrexas e tabernas, da xente ordinaria e da extraordinaria, de militantes e paseantes e da xente nova a esgalla.

Galicia necesita recoñecerse como economía e finanzas propias, a pesar da desfeita, do espolio, do vendaval que levou por diante as nosas Caixas e aforros diante duns dirixentes que xogaron a especuladores e duns políticos nefastos. Galicia debe saberse capaz de reconstruírse unha vez máis.

Resulta difícil definir e acordar que vai ser Galicia nese futuro incerto do concerto dos pobos e nacións. Estados, soberanías, rexións económicas, comunidades humanas… Todo está aberto e incerto, cambiante. Pero debemos deixar claro que queremos ser un suxeito político, cultural, económico. Que temos os nosos triunfos e que os queremos xogar.

Se o movemento LGTBI conseguiu manifestar a súa orgullosa autoafirmación na diferenza cunha mobilización espectacular, como non seremos os galegos e galegas quen de afirmarnos na nosa diversidade, diante do universo? Porque necesitamos unha boa dose de orgullo san, sandador, que nos faga saír do armario, e afirmar que seguimos por aquí para aspirar a todo sen deixar de sermos, agradecidamente, como somos.

Galicia necesita vencer, contrarrestar esa axenda oculta da “Galicia 0”que nos desgoberna.

Advertisements
Estas entrada foi publicada en Editorial coas etiquetas , , , , , , . Ligazón permanente.

Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair / Cambiar )

Twitter picture

Estás a comentar desde a túa conta de Twitter. Sair / Cambiar )

Facebook photo

Estás a comentar desde a túa conta de Facebook. Sair / Cambiar )

Google+ photo

Estás a comentar desde a túa conta de Google+. Sair / Cambiar )

Conectando a %s