Á SOMBRA DE CABRUI


Manolo Regal Ledo

 Cabrui é unha pequena parroquia do concello de Mesía, na Coruña. Hai poucos días fun invitado a este lugar polo crego Víctor Blanco Naveira. Tiña que falar, conversar, compartir sobre da escoita da Palabra de Deus, da Palabra humana, con algunhas das persoas alí congregadas para celebrar o encontro anual de URCA, esa organización xuvenil que busca desenvolver e celebrar a harmonía natural entre a expresión artística de calquera clase que sexa e a fe.

Cabrui é unha parroquia máis do rural galego: sae o sol polo leste e pousa polo oeste, os loureiros conservan o vello oficio de rodearen as casas para as gardar dos temporais do inverno, medran as herbas nos prados con teimosía, desafiando a seca; hai casas ben amañadas, acollendo xente, moita dela ben entrada en anos e nostalxias, e, polo medio, algunhas casiñas despedíndose xa do seu oficio santo de acubillar xentes e soños durante anos e anos de loita e pranto e festa.

Cabrui é unha parroquia á que, como a calquera outra de Galicia, non se pode ir co afán de falar de escoita, senón coa humilde disposición de escoitar. E as palabras xorden caladas de calquera recanto, por máis que a orde do día me levase a acougar na casa do crego, unha antiga corte de ovellas, a Raíña, na que hai cama feita e, a carón, espazo de oración cheo de símbolos que teñen moito que ver coa historia particular deste crego orixinal e das persoas que o acompañan día a día nos seus soños, nas súas benditas tolerías.

En Cabrui falan as pedras, falan as árbores, falan as noites, falan os días, fala o silencio, fala a palabra. En Cabrui óese a tenrura, o abrazo, a esperanza, a imaxinación, a liberdade, a fondura. En Cabrui óese a Deus que foi desprezado. En Cabrui óese a xente que andou derrotada.

Se ides a Cabrui, e faredes ben en ir, non vaiades para falar de escoita coma min, senón que para escoitardes. Volveredes cun par de pombas nas mans.

Advertisements

Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair /  Cambiar )

Google+ photo

Estás a comentar desde a túa conta de Google+. Sair /  Cambiar )

Twitter picture

Estás a comentar desde a túa conta de Twitter. Sair /  Cambiar )

Facebook photo

Estás a comentar desde a túa conta de Facebook. Sair /  Cambiar )

w

Conectando a %s

Blog en WordPress.com.

Up ↑

%d bloggers like this: